Koordinatori i LSDM-së në njësinë e tretë zgjedhore, Aco Velkovski, ka reaguar ashpër ndaj Qeverisë për gjendjen e bujqësisë dhe problemet me grumbullimin e produkteve bujqësore.
„KRYEMINISTËR, MINISTËR I BUJQËSISË, DREJTOR I LOTARISË – MJAFT MË!
Ashtu siç kishte 5.5 milionë për një koncert, duhet të ketë edhe për bujqit?!
Në Prilep, bujqit janë në rrugë, speci i kuq shitet për 15 denarë, ndërsa nuk ka as grumbullim! Në Kavadar, vraneci nuk grumbullohet, ndërsa në Koçan, orizi po kalbet…
Siguroni një fond intervenues nga Lotaria e Maqedonisë, ashtu siç siguruat për koncertin, dhe paguani diferencën për specin, vranecin, orizin dhe gjithçka tjetër që vjen në radhë.
Kështu, më në fund, bujqve do t’u qëllojë BINGO!
Ndërsa në vend që BINGO-ja e radhës të jetë grumbullimi dhe çmimi i garantuar i lakrës, me siguri do t’ju kujtohet të rrisni edhe çmimin e druve të zjarrit për amvisëritë me 30%, si qershia mbi tortë e gjithë kësaj vuajtjeje.
I shkatërruat bujqit, po zbrazni xhepat e popullit, ndërsa po krijoni një ELITË për veten tuaj.
Kjo duhet të ndalet. Bëhet fjalë për jetën tonë!
Maqedonia nuk është shtet vetëm për ELITËN.
Maqedonia është edhe e popullit të bukur dhe modest“, shkruan Velkovski.
