Publicisti i njohur shqiptar, Kim Mehmeti, i është bashkuar mediumit më të ri në vend, televizionit Tëvë1.
Ai do të jetë prezent në një emision dyjavor për të shtjelluar dhe analizuar ngjarjet kryesore politike në Kosovë, Shqipëri, Maqedoni të Veriut dhe më gjerë.
Drejtori gjeneral i Tëvë1, Mehmet Kalisi e mirëpriti ardhjen e publicistit Mehmeti dhe i uroi suksese në angazhimin e ri në televizionin që ai drejton.
Ndërkohë publicisti Mehmeti tha se ndjehet i priveligjuar që po i bashkohet mediumit më të ri dhe ndër më të sukseshmit në trojet shqiptare.
Kim Mehmeti ka lindur në fshatin Gërçec, Shkup në vitin 1955. Është i njohur si shkrimtar, romansier, tregimtar, eseist, publicistë dhe përkthyes nga gjuha maqedonase në gjuhën shqipe dhe anasjelltas.
Është një ndër themeluesit e së përjavshmes “Lobi” e cila botohej në Shkup nga viti 2001 deri në vitin 2006. Ka qenë redaktor i revistës për kulturë “Jehona” (Shkup), redaktor i veprimtarisë botuese pranë SH.B. “Flaka e vëllazërimit” (1991-1992). Në Institutin Shoqëria e Hapur – Maqedoni ka punuar si koordinator i veprimtarisë botuese. Pastaj ka punuar si kryeredaktor për Maqedoninë i Rrjetit Informativ Evropian (AIM) dhe ka qenë edhe koordinator i këtij rrjeti për Ballkanin Perëndimor (1993-2003). Nga viti 1997 deri në vitin 2003 ka qenë drejtor ekzekutiv i Qendrës për Bashkëpunim dhe Mirëkuptim Multikulturorë në Shkup.
Kim Mehmeti është nismëtar i më shumë iniciativave qytetare në Maqedoni dhe në rajon.
Përpos në gjuhën amtare, Kim Mehmeti shkruan dhe boton edhe në gjuhën maqedonase.
Veprat e Kim Mehmetit janë përkthyer në gjuhën gjermane, franceze, bullgare, turke, kroate dhe në gjuhë tjera.
