Prokuroria Themelore Publike e Kavadarit ka siguruar prova dhe ka ngritur aktakuzë kundër një personi të dyshuar për veprat penale “Shtrëngim” sipas nenit 258 paragrafi 1 lidhur me nenin 19 (në tentativë), si dhe “Kërcënim i sigurisë” sipas nenit 144 paragrafi 4 lidhur me paragrafët 2 dhe 1 të Kodit Penal.
Me qëllim për të përfituar pasuri në mënyrë të paligjshme, i pandehuri më 2 shtator i ka drejtuar një kërcënim serioz kryetarit të Komunës së Negotinës dhe familjes së tij, duke e kërcënuar me sulm ndaj jetës dhe trupit të tyre, me qëllim që t’i nxirrte shumën prej 3.000 eurosh. I dëmtuari nuk e ka përmbushur kërkesën dhe rastin e ka raportuar në polici.
Në periudhën nga 4 deri më 18 shtator, i akuzuari ka dërguar mesazhe kërcënuese drejtuar kryetarit të komunës me qëllim ta shqetësojë dhe ta frikësojë. Disa nga mesazhet i ka dërguar edhe në adresën zyrtare të komunës, në adresat e Ministrisë së Punëve të Brendshme si dhe te gazetarë. Me këtë, te i dëmtuari ka shkaktuar ndjenjë pasigurie, kërcënimi dhe frike për sigurinë e tij personale, të familjes dhe të qytetarëve të Negotinës.
Prokurori kompetent, përmes aktakuzës, ka kërkuar zgjatjen e masës së paraburgimit për të pandehurin, pasi ekziston rreziku real për arratisje – duke qenë se një pjesë e familjes së tij jeton jashtë vendit. Po ashtu, ekzistojnë rrethana që tregojnë se ai mund ta përsërisë veprën, madje edhe t’i realizojë kërcënimet dhe shantazhin.
Prokurori ka pasur parasysh edhe faktin se i njëjti person tashmë është i dënuar për veprat penale “dhunë” dhe “ndjekje” ndaj kryetarit të komunës, për të cilat i është shqiptuar një dënim me kusht, për të cilin Prokuroria do të kërkojë revokim, pasi periudha e provës ende nuk ka kaluar, ndërsa i pandehuri ka kryer vepra të reja penale.
