Ivanov: Procesi ngjan në marrëveshje personale mes Zaevit dhe Ciprasit

Presidenti i vendit Gjorgje Ivanov, vlerëson se i gjithë procesi i zgjidhjes së emrit ngjan në marrëveshje personale mes kryeministrave Zaev dhe Cipras. Kështu thuhet në komunikatën e dërguar nga kabineti presidencial, pas takimit që realizuan Presidenti Ivanov dhe ministri i Jashtëm, Nikolla Dimitrov. Ky i fundit, informoi Ivanovin për zhvillimet e fundit të negociatave për emrin. Nga kabineti i Ivanovit më tej kanë shtuar se qëndrimi I presidentit është se me mosrespektimin e dispozitave ligjore për lidhjen e marrëveshjeve ndërkombëtare, I gjithë procesi ngjan në marrëveshje personale mes dy kryeministrave. “I gjithë procesi i ngjan marrëveshjes personale mes kryeministrit Zaev dhe kryeministrit Cipras, për çka nuk ka siguruar konsensus nacional në Republikën e Maqedonisë. Qëndrimi im është se nuk pranoj zgjidhje për çështjen e emrit për përdorim të përgjithshëm, apo erga omnes”. Sipas Ivanovit, arritja e marrëveshjes ndërkombëtare duhet të jetë në pajtueshmëri me Kushtetutën e vendit dhe jo të parasheh ndryshime të tij”, thuhet në njoftimin e kabinetit të presidentit Ivanov.