Ping pong mes institucioneve kompetente me mandatin për formimin e Qeverisë së re. Presidenca, Kuvendi dhe VMRO-DPMNE hedhin topin njëri-tjetrit për hapat e tjerë që duhet të ndërmeren pasi Gruevski nuk arriti të formojë Qeverinë për 20 ditët e kaluara. Sot duhet që kreu i VMRO-DPMNE-së t’ia kthejë mandatin presidentit Ivanov dhe më pas kreu i shtetit mandatin duhet të ja jep një lideri ose përfaqësuesi tjetër partiak. Nga VMRO-DPMNE gjatë gjithë ditës nuk ka pasur asnjë njoftim nëse Gruevski e ka kthyer mandatin ose kur do ta bëjë këtë. Ndërkaq nga vila e presidentit në Vodno kanë hedhur përgjegjësinë te Kuvendi duke thënë se kreu i institucionit më të lartë ligjvënës në vend duhet ta njoftojë nëse mandatari ka dorëzuar propozim për kabinetin e ri qeveritarë ose jo.
“Duke parë skadimin e afatit të parashikuar në nenin 90 nga Kushtetua e Maqedonisë, Kuvendi i Maqedonisë është i obliguar të njoftoj Presidentin e Maqedonisë, nëse mandatari ka dorëzuar program dhe propozim për përbërje të Qeverisë së re”, thonë nga kabineti i Presidentit të shtetit.
Por, ndërkohë nga Kuvendi i Maqedonisë konfirmuan për televizionin Shenja se e kanë njoftuar tanimë edhe zyrtarisht presidentin e vendit, Gjorgji Ivanov se mandatari Nikolla Gruevski deri në afatin e paraparë me ligj që skadoi mbrëmë në mesnatë, nuk ka dorëzuar propozim për kabinetin e ri qeveritarë dhe program për punën e Qeverisë. Pas përfundimit të këtyre procedurave, tani pritet që kreu i VMRO-DPMNE-së, Nikolla Gruevski të kthejë mandatin te presidenti Ivanov. Ky i fundit pritet që të njoftojë për veprimet e mëtutjeshme dhe nëse mandatin do t’ia jep liderit të partisë së dytë për nga numri i votave, Zoran Zaevit të LSDM-së apo një përfaqësuesi tjetër të VMRO-DPMNE-së.
