Djegia e deponisë, reagojnë qytetarët: Arsyetimet e kryetares janë banale

Edhe sot tetovarët janë zgjuar nën tymin e deponisë e cila ka vazhduar të digjet edhe pse me intenzitet më të vogël nga dita e djeshme. Zjarrfikësit kanë arritur që të lokalizojnë zjarrin, por flakët dhe tymi vëreheshin ende në disa lokacione në brendi të deponisë, ndërsa tymi në përmasa të mëdha vazhdonte të helmojë qytetin veçanërisht në orët e mëngjesit. Nga brigade e zjarrfikësve thanë se mbrëmë kanë punuar gjatë gjithë natës pa ndërprerë dhe janë të përkushtuar që sot të shuajnë përfundimisht edhe vatrat e fundit të zjarrit.
Qytetarët thanë se mbrëmë kanë kaluar një nga netët më të vështira për shkak të ajrit të ndotur nga tymi i zjarrit. Ata kërkojnë përgjegjësi nga kryetarja e komunës së Tetovës, Teuta Arifi, që ka lejuar si ngritjen e deponisë në hyrje të qytetit ashtu edhe djegien e së njëjtës. Një grup qytetarët të organizuar përmes rrjeteve sociale mbajtën edhe një protestë, ndërsa qytetarë të tjerë të anketuar nga televizioni Shenja ngjarjen e djeshme e quajtën fatkeqësi skandaloze duke e krahasuar Tetovën edhe me Afrikën.
Deponia e ngritur në hyrje të qytetit është shfrytëzuar nga ndërmarrja publike komunale Tetovë për grumbullimin e mbeturinave të qytetit. Edhe përkundër premtimeve parazgjedhore, udhëheqësit aktual të Komunës për katër vite nuk arritën të dislokojnë deponinë e cila ndodhet në hyrje të qytetit. Ndryshe dje edhe organizatat ambientaliste si Lëvizja EvoGuerilla thanë se do të kërkojnë edhe përgjegjësi penale nga kryetarja aktuale e Komunës, Teuta Arifi dhe udhëheqësia e pushtetit lokal.
Arben Zeqiri /SHENJA/

Djegia e deponisë, reagojnë qytetarët… by tvshenjaofficial