Partia LIBRA e Ben Blushit do të dalë vetëm në zgjedhjet e 18 qershorit, duke shmangur të bëhet pjesë e koalicioneve parazgjedhore. Gjatë prezantimit të programit, Blushi tha se “ashtu si të gjithë shqiptarët, edhe ne nuk duam që qeveria dhe elita e korruptuar e Tiranës të numërojnë votat tona. Ato janë votat e një partie të lirë të cilët nuk mund ti numërojnë ata që shesin dhe blejnë votat. Votat e LIBRA-s janë votat e lirisë që nuk mund dhe nuk duhet të numërohen nga robëria e korrupsionit dhe degradimit të shoqërisë sonë”.
Blushi u shpreh pro kërkesës së PD-së për numërim elektronik. “Ne jemi të bindur se sistemi i numërimit elektronik është plotësisht i aplikueshëm dhe ka kosto financiare dhe morale më të ulët, se numërimi manual nga numëruesit e rëndomtë të partive të vjetra. LIBRA është një parti e re që nuk pranon që votat t’ja numërojnë partitë e vjetra, kjo është çështja”, tha ai. Blushi ka deklaruar se LIBRA do jetë surpriza e zgjedhjeve të qershorit.
Teksa ka shpallur programin e partisë së tij LIBRA, Ben Blushi ka shprehur qëndrimin e tij për situatën e krijuar në vend. Blushi tha se zhvillimet më të fundit politike tregojnë për gjendjen e vështirë ku ndodhet Shqipëria.
Kryetari i LIBRA-s është shprehur se numërimi elektronik është e vetmja zgjidhje për të mundësuar numërim të drejtë të votave, dhe për të shmangur manipulimet.
