Banorët e rrugës “Kiro Fetak” në Kumanovë, lagje e banuar kryesisht me shqiptarë, nesër do të protestojnë para komunës për shkak se siç thonë, tani dy javë ballafaqohen me mungesë të ujit. Ata janë të revoltuar që në shekullin 21 përballen me mungesë të këtij kushti elementar të jetës. “Gypat e ujit në lagjen tonë datojnë nga viti 1968. Kanë kaluar 50 vite e tepër dhe kanë mbetur të njëjtat gypa. Për çdo ditë ndodhin defekte, ndërprerje, ende nuk janë plotësuar premtimet e dhëna para dy viteve”, thekson një banor i revoltuar i lagjes. Protesta do të mbahet me fillim në ora 12, kurse banorët thonë se do të protestojnë deri sa të tejkalohet problemi me të cilin përballen.
