Policia e ka arrestuar një person në lidhje me rastin e para pak orësh, nga ku pas një shkëmbim zjarri është plagosur një person.
Kjo është bërë e ditur përmes një komunikate për media nga Policia e Kosovës, shkruan lajmi.net.
Po ashtu, Policia e Kosovës ka bërë të ditur se edhe dy persona tjerë janë në kërkim.
Njoftimi i plotë:
Me datë 10 shtator 2019 rreth orës 12:43, Policia e Kosovës është njoftuar për të shtëna me armë zjarri në rrugën “Nëna Terezë”- Pejë.
Menjëherë njësitet relevante të policisë kanë shkuar në vendngjarje për të mësuar të gjitha rrethanat lidhur me rast.
Si pasojë e këtij incidenti një person është plagosur, i njëjti është dërguar në Spitalin Rajonal në Pejë, për trajtim të mëtutjeshëm dhe sipas ekipit mjekësor gjendja e tij është jashtë rrezikut për jetë.
Policia ka zbuluar identitetin e personit të dyshuar dhe pas një pune intensive operativo-hetimore është arrestuar 1 (një) person i dyshuar dhe është në kërkim të 2 (dy) personave të tjerë të involvuar në këtë rast, identiteti i të cilëve është i njohur për Policinë, po ashtu edhe personi i plagosur i cili është në Spital, konsiderohet të jetë i dyshuar.
Të gjitha veprimet policore janë ndërmarrë në koordinim të plotë me prokurorin e shtetit. /Lajmi.net/
