Universiteti “Shën Cirili dhe Metodi” këtë muaj fillon një transformim të plotë digjital. Së pari do të digjitalizojë të gjitha shërbimet e studentëve dhe plani është që shërbimet bazë të përfundojnë plotësisht deri në fillim të vitit akademik 2025/2026 dhe procesi të përfundojë me futjen e një indeksi elektronik. “Ky është një proces që do të zgjasë. Supozimi im është se brenda një viti apo një viti e gjysmë ky proces mund të përfundojë, por UCM po hyn në këtë proces dhe ky është prioriteti ynë”, deklaroi rektorja e Universitetit të Shkupit, Biljana Angellova. Siç tha, prioriteti i dytë me të cilin po punojnë është cilësia e Universitetit – cilësia e mësimdhënies dhe hulumtimeve. “Të dy proceset janë të rëndësishme. I gjithë fokusi në periudhën e ardhshme do të jetë në këto dy gjëra. Presim që digjitalizimi dhe menaxhimi i përmirësuar i cilësisë do të përmirësojnë edhe rangimin e vetë universitetit”, tha Angellova para hapjes së konferencës shkencore “Sfidat e reja në arsimin e lartë dhe lëvizja Sindikale”, e cila u organizua sot nga Unioni i sindikatave të UCM me rastin e pesë viteve nga themelimi i saj. Sa i përket numrit të madh të programeve të studimit në fakultetet e UCM-së, rektorja theksoi se reduktimi i tyre ka të bëjë me procesin e akreditimit dhe do të varet nga dispozitat në ligjin e ri për arsimin e lartë. Pret që të rikthehet modulariteti i programeve të studimit, gjë që, tha, “në vetvete nënkupton se do të kemi një numër më të vogël të programeve të studimit”. “Ajo që tani është e shpërndarë në programe të veçanta studimi do të kompresohet në module brenda programeve të studimit. Është gjithashtu një proces që varet jo vetëm nga Universiteti, por edhe nga vetë ligji, pra se çfarë saktësisht do të parashikohet në ligjin e ri. Ne jemi ende duke punuar sipas zgjidhjes së vjetër ligjore nga viti 2018. Pikërisht kjo parashikon edhe ndarjen e programeve të studimit në një numër më të madh, varësisht nëse janë trevjeçare, katërvjeçare, njëvjeçare, dyvjeçare – e ciklit të dytë etj.Ne presim që me ligjin e ri do të mund t’i komprementojmë ato dhe në këtë mënyrë të shtrëngojmë dhe reduktojmë numrin e programeve të studimit dhe të jemi më efikas. Dhe sigurisht, programet e akredituara të studimit, që është çështje akreditimi, është e nevojshme që ajo periudhë të përfundojë dhe pastaj të përcaktohet efikasiteti i programeve ekzistuese të studimit”, tha rektorja e Universitetit të Shkupit
