Festa e paralajmëruar për nesër në më shumë qytete të Maqedonisë lidhur me pranimin e ftesës së Maqedonisë për fillimin e negociatave për anëtarësim në NATO, për kryeministrin Zoran Zaev është me peshë dhe ka për qëllim të shënohet aspirata dekadëshe e RMsë.
“Kemi vendosur muzikën ta sjellim tek qytetarët, jo t’i bartim me autobusë qytetarët të festojnë. Gjithsesi secili ka të drejtë të ketë qëndrimin e vet”, ka thënë kryeministri. Ai ka sqaruar se festa organizohet me vendim të Qeverisë, koncepti nënkupton decentralizim, muzikë ndryshe dhe cilësore në më shumë qytete, program të pasur kulturor. Zaev ka paralajmëruar se shërbimet me opinionin menjëherë do të bëjnë publike lartësinë e shpenzimeve pasi të kenë informatat e plota nga të gjitha subjektet e përfshirë në ngjarje, ku siç ka shtuar “është e mbështetur nga autoritetet lokale në 15 qytete, para së gjithash me ndihmë organizative dhe logjistike”.
Ai mes tjerash ka bërë apel deri te opozita që të ndalojë të përhap urrejtje para shumicës demokratike në Maqedoni.
“Opozita duhet ta mbështesë të ardhmen e Maqedonisë dhe të tërhiqet nga përhapja e urrejtjes, pasi edhe muzikantët dhe grupet nëpër Maqedoni janë qytetarë që do ta thonë fjalën e tyre në referendum”, ka porositur kryeministri Zaev.
