Presidenti i Komisionit Europian, Jean Claude Juncker, pranon se Maqedonia, Shqipëria, Bosnja, Kosova, Mali i Zi dhe Serbia kanë bërë përparime në rrugën e tyre drejt BE-së. Por, sipas tij, ritmi është i ngadaltë dhe kjo ka bërë që rajoni të jetë i zhgënjyer me BE-në.
Juncker theksoi se pavarësisht disa përparimeve të Ballkanit, zgjerimi i Bashkimit Europian nuk do të ndodhë përpara vitit 2019. “Për momentin nuk është e mundur që të anëtarësohen shtete të reja deri në vitin 2019. Do të doja që perspektiva europiane të shihet jo si një ftesë, por si një domosdoshmëri”,– u shpreh Juncker.
Megjithatë, Presidenti i Komisionit Europian shtoi se Serbia dhe Mali i Zi do të jenë anëtare të unionit përpara vitit 2025. Deklarata u bë gjatë takimit me kryeministrin bullgar, Bojko Borisov.
Bullgaria merr presidencën e ardhshme të Këshillit të BE-së dhe nga Juncker kjo shihet si një mundësi që vendet e Ballkanit Perëndimor të afrohen më shumë me perspektivën europiane në 6 muajt e ardhshëm.“Realisht kjo është një mundësi që ne të afrojmë Ballkanin Perëndimor, ndërkohë që Britania e Madhe po tërhiqet nga BE”,– u shpreh Juncker.
