Kombinati “Jugohrom” ka ndërprerë tërësisht punimet për vendosjen e filtrave. Sipas drejtuesve të fabrikës vendimi i tillë është marrë për shkak të refuzimit të kërkesës për hapjen e fabrikës dhe vijimin paralelisht të punimeve për vendosjen e filtrave…
Kombinati “Jugohrom” ka ndërprerë tërësisht punimet për vendosjen e filtrave. Sipas drejtuesve të fabrikës vendimi i tillë është marrë për shkak të refuzimit të kërkesës për hapjen e fabrikës dhe vijimin paralelisht të punimeve për vendosjen e filtrave. Megjithatë Ministria e Ekologjisë mbetet fuqishëm në qëndrimin që fabrika të hapet vetëm pas përmbushjes së standardeve ekologjike.
“Bisedat ishin pak të ashpra sepse kishte mendime të kundërta dhe z.Bashkim Ameti kërkonte që të kryhen filtrat pastaj të vazhdohet me punë, kurse kërkesa jonë ishte që këtë afat deri sa s’ka ndotje, nga prilli deri në tetor të punojmë dhe paralelisht të instalojmë filtrat”, tha Bajram Amiti, kryetar i Sindikatës së Jugohromit, njofton Alsat-M.
Ndërkaq organizata për mbrojtjen e mjedisit EcoGuerilla ka publikuar sot rezultatet e fundit nga matjet e ndotjes së ajrit. Sipas tyre që nga mbyllja e fabrikës ndotja e ajrit është ulur më shumë se 50%.
“Ne kërkojmë nga Qeveria që të mos lejojë hapjen e Jugohromit pa filtra sepse sa herë që Jugohromi nuk ka punuar ndotja është zvogëluar për më shumë se 50 për qind. Të dhënat e këtilla burojnë nga matjet që kryhen nga ministria e mjedisit”, dekaroi Arianit Xhaferi, EcoGruerilla.
Ndërkohë sipas informatave në Ministri të Ekologjisë, nëse vazhdon kjo situatë duke mos punuar në drejtim të vënies së filtrave, Jugohromi rrezikon që së shpejti të humb krejtësisht lejen për të vazhduar punën.
