Me rastin e Ditës Ndërkombëtare të Sëmundjeve të Rralla – 28 Shkurt dhe përfundimit të sezonit të tetë të projektit “Po njohim sëmundjet e rralla”, qëllimi i të cilit është ngritja e vetëdijes publike për sfidat me të cilat përballen pacientët me sëmundje të rralla dhe familjet e tyre, Ministri i Shëndetësisë, Azir Aliu, theksoi se Ministria e Shëndetësisë nuk do të lejojë që asnjë pacient me sëmundje të rralla të presë asnjë ditë për ilaçe.
Ai bëri me dije se është ndryshuar procedura se si do të arrihet deri te ilaçet për pacientët me sëmundje të rralla dhe se procedura do të jetë trevjeçare.
“Për herë të parë në shtetin tonë po hapim një procedurë trevjeçare. Çdo vit pacientët me sëmundje të rralla i merrnin ilaçet me vonesë ose, për fat të keq, prisnin nga një javë ose një muaj. Duke marrë parasysh faktin se pacientët janë të rinj, ndërsa ilaçet lidhen me peshën e pacientit, është shumë e vështirë të bëhet një analizë që do të jetë e saktë për numrin e pacientëve që do të shërbehen gjatë gjithë vitit. Për atë qëllim, metodologjia ndryshoi dhe tani po hapim procedurë për tre vjet. Në rast se shpenzohen më shumë se sasitë që ka shteti, ne të kemi kohë të hapim një procedurë tjetër, gjithçka me qëllim që qytetarët t’i marrin ilaçet me kohë. Procedura e tenderit do të jetë për tre vjet, gjegjësisht do të përdoren aq sasi sa kemi nevojë në shtet”, theksoi Aliu.
Ai porositi që kjo kategori qytetarësh dhe familjet e tyre të jenë të qetë sepse shteti dhe Ministria e Shëndetësisë, siç thotë ai, nuk do të lejojnë që asnjë nga pacientët tanë me sëmundje të rralla të presë asnjë ditë për ilaçe.(INA)
