Universiteti Ballkanik mirëpriti një delegacion zyrtar nga Komuna e Preshevës, i udhëhequr nga Kryetarja e Komunës, znj. Ardita Sinani. Në delegacion morën pjesë edhe z. Ragmi Mustafa, Nënkryetar i Komunës së Preshevës, z. Armend Aliu, Nënkryetar i Kuvendit Komunal, si dhe z. Gazmend Idrizi, Shef i Marrëdhënieve me Publikun i Kryetares së Komunës.
Delegacioni u prit nga Rektori i Universitetit, Prof. Lütfi Sunar, dhe Zëvendësrektori, Prof. i Asoc. Ahmet Lökçe.
Gjatë takimit zyrtar u diskutua për forcimin e bashkëpunimit institucional, shkëmbimin e përvojave dhe krijimin e mundësive konkrete për projekte të përbashkëta në fushën e arsimit, kulturës dhe zhvillimit lokal.
Si rezultat i vizitës, u nënshkrua një Memorandum Bashkëpunimi, i cili synon ndërtimin e një partneriteti afatgjatë dhe realizimin e iniciativave të përbashkëta me interes të ndërsjellë. Pas nënshkrimit, delegacioni vizitoi ambientet e universitetit, duke u njohur nga afër me infrastrukturën akademike, kapacitetet institucionale dhe vizionin për bashkëpunim rajonal dhe ndërkombëtar.
Vizita vlerësohet si një hap i rëndësishëm drejt thellimit të lidhjeve ndërinstitucionale dhe forcimit të bashkëpunimit ndërmjet universiteteve dhe pushtetit lokal në rajon.
