Ministri i Brendshëm gjerman Alexander Dobrindt (CSU) dha këto ditë një vlerësim pozitiv për “kthesën në politikën e migrimit”. Sipas tij, numri i kërkesave për azil në Gjermani ka rënë në afërsisht 113,000 në vitin 2025 – një rënie prej 50 përqind krahasuar me vitin e kaluar. Ministria e Brendshme ia atribuon këtë rënie kontrolleve të rrepta kufitare dhe kthimit të azilkërkuesve në kufijtë e jashtëm të vendit. Këto masa janë futur në fuqi që kur ai mori detyrën në maj.
Që nga maji, Policia Federale ka kryer kontrolle të rastësishme në të gjitha kufijtë tokësorë dhe ka shtuar dukshëm numrin e personelit. Sipas Policisë Federale, 21,000 personave iu refuzua drejtpërdrejt hyrja në Gjermani sepse nuk kishin dokumentet e nevojshme të udhëtimit.
Sipas policisë, afërsisht 1,000 prej këtyre personave shprehën dëshirën e tyre për të marrë azil dhe iu refuzua hyrja, megjithëse kishin të drejtën e një seance dëgjimore. Gjykatat e kanë mbështetur këtë të drejtë në raste individuale. Ministria e Brendshme vazhdon të argumentojë se ligji përkatës evropian për azilin nuk duhet të zbatohet, sepse Gjermania është në një “gjendje të jashtëzakonshme”.
Në një intervistë me gazetën Bild, Ministri i Brendshëm Dobrindt tha se ai merret me çështjet e migracionit në mënyrë të qartë dhe të vazhdueshme. “Ai që nuk ka të drejtë për mbrojtje nuk duhet të vijë – ai që kryen një krim duhet të largohet. Sinjali i qartë nga Gjermania se politika e migracionit në Evropë ka ndryshuar u mor në të gjithë botën”, shpjegoi Dobrindt. Ndër masa të tjera, Qeveria e re ndaloi ribashkimin familjar të azilkërkuesve. Më parë, 1,000 persona në muaj lejoheshin të hynin në vend me qëllim ribashkimin familjar.
“Kjo nuk ka pothuajse asnjë lidhje me kontrollet kufitare”
Hulumtuesi i migracionit Gerald Knaus beson se rënia e numrit të azilkërkuesve nuk është vetëm rezultat i politikave më të rrepta qeveritare dhe kontrolleve kufitare. Ai beson se mbi të gjitha, fundi i luftës civile në Siri në vitin 2024 ishte arsyeja kryesore pse njerëzit nuk largohen më nga atdheu i tyre.
Sipas Knaus, faktori vendimtar është situata në vendet e origjinës së migrantëve. Numri mujor i kërkesave për azil ka mbetur konstant në rreth 9,000 në muaj, si para ashtu edhe pas futjes së kontrolleve më të rrepta kufitare në maj, thotë Knaus.
“Kombi numër një, i cili ka ardhur në Gjermani duke kërkuar mbrojtje për 10 vitet e fundit, nuk po vjen më. Ky është një ndryshim i madh. Numri i vogël i migrantëve nuk ka pothuajse asnjë lidhje me kontrollet në kufirin gjermano-polak ose gjermano-austriak”, tha Knaus nga Iniciativa Evropiane e Stabilitetit (ESI) për DW.
Marrëveshjet e ripranimit të BE-së
Shumë më të rëndësishme se kontrollet kufitare dhe masat kombëtare janë, sipas mendimit të Knaus, përfundimet e Bashkimit Evropian nga dhjetori 2025, të cilat lejojnë marrëveshje me vendet e treta për pritjen e migrantëve të kthyer. Njerëzit që, për shembull, hynë në Itali ose Greqi nëpërmjet Libisë mund të kthehen në një vend tjetër në Afrikë pa iu nënshtruar një procedure azili. Parimi është i ngjashëm me atë të marrëveshjes së vitit 2016 me Turqinë për të ripranuar refugjatët sirianë.
“Nëse BE-ja e shfrytëzon këtë mundësi, numri i njerëzve që aktualisht udhëtojnë ilegalisht nëpërmjet rrugës mesdhetare mund të bjerë ndjeshëm”, thotë studiuesi i migracionit Knaus. Ai beson se njerëzit nuk do të rrezikonin të kalonin detin nëse do të dinin se nuk mund të qëndronin në BE. Sipas Agjencisë së Azilit të BE-së në Maltë, rruga mesdhetare nëpërmjet Libisë është aktualisht më e përdorura, por edhe më e rrezikshmja.
Fundi i luftës civile në Siri ka ndikim jo vetëm në Gjermani, por edhe në pjesën tjetër të Evropës. Numri i kërkesave për azil për herë të parë në BE ra me 25 përqind midis janarit dhe nëntorit të vitit të kaluar. Sipas Komisionerit të BE-së për Migracionin, Magnus Brunner, numri i kthimeve dhe dëbimeve është rritur me 20 përqind.
Dëbimet në Siri “jorealiste”
Më shumë dëbime të migrantëve pa leje qëndrimi janë gjithashtu një qëllim i koalicionit qeverisës në Berlin. Ministri i Brendshëm Federal Alexander Dobrindt (CSU) dëshiron të rrisë numrin e dëbimeve të njerëzve që duhet të largohen nga vendi deri në vitin 2026.
Vitin e kaluar, pati 21,500 dëbime (nga janari deri në nëntor), një rritje prej 20 përqind krahasuar me vitin 2024. Partia CSU e Dobrindt tani propozon që një numri të madh të refugjatëve sirianë të mos u zgjatet qëndrimi në Gjermani, me qëllim që ata të kthehen në Siri.
Studiuesi i migracionit Gerald Knaus beson se ky është një propozim i pamundur. Qeveria siriane, thotë ai, do të duhet të bjerë dakord me këtë. Do të pasojnë ndoshta edhe dhjetëra mijëra ankesa, të cilat do të përfundojnë në gjykatat në Gjermani.
“Pritja që një numër i madh njerëzish të mund të kthehen në Siri ose të dëbohen, duke pasur parasysh gjithçka që dimë, është plotësisht jorealiste. Kjo nuk do të ndodhë, edhe nëse mund të jetë ligjërisht e mundur sipas Aktit të Azilit”, thotë Gerald Knaus. / REL
