Drejtori i Fondit të Sigurimit Pensional dhe Invalidor, Nikolla Memov, ka theksuar se rritja lineare e pensioneve bëhet për t’u harmonizuar me standardin e jetesës. Ai vlerëson se kjo rritje është e drejtë, pasi çmimet janë rritur në mënyrë të njëjtë për të gjithë. Memov në intervistën javore të Radio Europës së Lirë thotë se pagesa e pensioneve do të jetë e rregullt dhe siguron se nuk po shqyrtohet rritja e moshës për pensionim. Memov thotë se ka dy iniciativa nga qytetarë të dorëzuara në Gjykatën Kushtetuese dhe tani do të shohim se çfarë do të vendoset.
NIKOLLA MEMOV, DREJTORI I FSPI-SË
‘’Vendimi është para miratimit, pra është në zhvillim e sipër debati publik për këtë çështje të rëndësishme në shoqëri. Dua të theksoj se ndryshimi i Ligjit për Sigurim Pensional dhe Invalidor u miratua vitin e kaluar, me kërkesë të pensionistëve u mor ky vendim që harmonizimi i pensioneve sipas modelit zviceran, përqindja të zëvendësohej me rritje lineare të pensioneve, pra harmonizim linear i pensioneve për të gjithë 345.000 pensionistët”.
Memov njoftoi se sipas ndryshimeve të ligjit të miratuara këtë vit në muajin mars pensionistët do të marrin një rritje lineare prej 1000 denarësh, dhe se në shtator është planifikuar të rikthehen dispozitat e vjetra të Ligjit për Pensione. Ndërsa sa i përket gjendjes financiare të Fondit Pensional, Memov theksoi se pensionistët mund të jenë të qetë, pasi pagesa e pensioneve do të vazhdojë të jetë e rregullt.
NIKOLLA MEMOV, DREJTORI I FSPI-SË
“Në buxheti e vitit 2026 janë paraparë rreth 117 miliardë denarë për pagesën e pensioneve. Megjithatë, janë parashikuar edhe fondet për pagesën e sigurimit shëndetësor të pensionistëve, shpenzimet tranzicionale, pra pagesat ndaj shoqërive pensionale të shtyllës së dytë. Për këtë arsye, Qeveria do të sigurojë rreth 62 miliardë denarë, që është rreth 1 miliard euro”.
Memov tha se ky sigurim i qeverisë është për të garantuar pagesën me kohë të pensioneve, sigurimin shëndetësor të pensionistëve dhe kostot e tranzicionit drejt shtyllës së dytë pensionale.
/SHENJA/
