Kryetari i Këshillit të Komunës së Tetovës, Jusuf Abduli, sot ka thirrur një seancë të jashtëzakonshme, në të cilën është miratuar vendimi që 1 dhjetori 2025 (e hënë) të shpallet ditë zie në Komunën e Tetovës. Vendimi vjen pas ndarjes nga jeta të këngëtarit të njohur tetovar Shpat Kasapi, një prej emrave që la gjurmë të rëndësishme në kulturën dhe muzikën shqiptare.
Në fjalën e tij, Abduli theksoi se Shpat Kasapi ishte një artist që me talentin, prezencën dhe krijimtarinë e tij pasuroi skenën muzikore në Tetovë, në Republikën e Maqedonisë së Veriut dhe në të gjitha trojet shqiptare.
“Shpallja e ditës së zisë është një akt respekti për kontributin e madh kulturor që Shpat Kasapi i dha qytetit tonë dhe gjithë komunitetit artistik,” deklaroi Abduli. Ai shtoi se Tetova humbi një artist të dashur dhe një simbol të muzikës moderne shqiptare.
Kryetari i Këshillit të Tetovës, në emër të institucionit, ka shprehur ngushëllimet më të sinqerta për familjen Kasapi, komunitetin artistik dhe gjithë qytetarët që e kanë ndier këtë humbje.
Gjatë ditës së zisë, flamuri në institucionet komunale do të ulet në gjysmë-shtizë, ndërsa aktivitetet festive në qytet do të pezullohen.
