Gjykata Penale e Shkupit ende nuk e ka miratuar aktakuzën e Prokurorisë për tragjedinë Koçanit. Procesi që do t’i hapte rrugën fillimit të gjykimit është vonuar për shkak se të akuzuarit kanë dorëzuar ankesa, ndërsa gjykata është duke i shqyrtuar. Për në shtator, sipas paralajmërimeve të kryeprokurorit Lupço Kocevski, duhet të ketë aktakuzë edhe për hetimin e dytë për tragjedinë e Koçanit, të cilin e udhëheqë Prokuroria për Ndjekjen e Krimit të Organizuar dhe Korrupsionit, në të cilin, deri më tani janë të përfshirë 27 zyrtarë policorë. Megjithatë, deri më tani për këtë hetim edhe nuk ka vendim prokurorial.
Sipas aktakuzës që pritet të miratohet në gjykatë, 34 persona fizik dhe tre juridik ndiqen për “Vepra të rënda kundër sigurisë së përgjithshme” sipas nenit 292, ndërsa njëri plotësisht ndiqet edhe për ryshfet dhe falsifikim dokumentesh.
Për tragjedinë në klubin e natës “Puls”, në të cilën humbën jetën 62 persona dhe rreth 200 të tjerë u plagosën, akuzohet pronari i klubit të natës “Puls”, Dejan Jovanov së bashku me vëllain dhe djalin e tij. Ata mbahen përgjegjës se nëpërmjet procedurave të paligjshme kanë ridestinuar objektin për kabare edhe pse nuk i ka plotësuar kushtet minimale teknike. Nuk ka pasur plan për vlerësimin e rrezikut, mbrojtje dhe shpëtim, sistem kundër zjarrit, ndërsa është ndërtuar me materiale lehtësisht të djegshme.
Të akuzuar janë edhe dy ish ministra të Ekonomisë, Kreshnik Bekteshi dhe Valon Saraçini, por edhe ish sekretarja shtetërore Razmena Çekiq-Duroviq dhe 5 të punësuar të tjerë në këtë resor, pasi në këmbim të ryshfetit “Pulse” ka siguruar licenca për punë edhe pse nuk i ka plotësuar kushtet ligjore. Në aktakuzë janë të përfshirë edhe tre ish kryetarët e Komunës së Koçanit, Ljupço Papazov, Ratko Dimitrovski dhe Nikolço Iliev, të cilët nuk kanë ndërmarrë veprime për të ndaluar funksionimin e klubit të natës edhe pse objekti nuk është parashikuar në Planin Detal Urbanistik të Koçanit.
Të akuzuar janë edhe katër drejtorë të Drejtorisë për Mbrojtje dhe Shpëtim, Bekim Maksuti, Shaban Saliu, Adnan Xhaferovski dhe Xhevat Selami, por edhe një inspektor i cili ka punuar në këtë drejtori. Të akuzuarit, nuk kanë organizuar mbikëqyrje për zbatimin e Ligjit për Mbrojtje dhe Shpëtim, ndërsa asnjëri prej drejtorëve nuk ka emëruar inspektor për Koçanin. Në listën e të akuzuarve janë edhe 3 inspektorë ndërtimorë të Komunës së Koçanit, të cilët fare nuk kanë kryer mbikëqyrje inspektuese, por edhe 4 inspektorë nga Inspektorati Shtetërorë. Prokuroria, konfirmoi se arsyeja e zjarrit janë mjetet piroteknike të cilat janë ndezur brenda objektit. Mjetet, siç tha Prokuroria janë furnizuar në mënyrë të paligjshme dhe nuk ka pasur paralajmërim në polici për përdorimin e tyre. /Alsat.mk
