Edhe pse prindërit dhe të afërmit e viktimave të zjarrit në diskotekën e Koçanit janë nën presion të kombinuar përmes kërcënimeve dhe premtimeve, megjithatë nuk është e vërtetë se nuk e dëgjojmë fjalën “drejtësi” në një vend që është katër herë më i vogël se vendi i presidentit serb Vuçiç.
Aktakuza për zjarrin në Koçan është në fazën e vlerësimit, ndërsa edhe opinioni publik në Maqedoninë e Veriut vazhdimisht kërkon drejtësi, ndër të tjera edhe përmes “Marshimeve të engjëjve” që mbahen rregullisht në Koçan, shkruan “Vërtetmatësi”.
Në vijim e sjellim të plotë publikimin:
Presidenti i Serbisë, Aleksandar Vuçiç, në fjalimin e tij drejtuar opinionit më 17.08.2025, pas trazirave në rrugë dhe përplasjes së policisë me demonstruesit në disa qytete të Serbisë, e shfrytëzoi tragjedinë me zjarrin në diskotekën “Puls” në Koçan për të ilustruar situatën politike e të sigurisë në vendin e tij.
Duke theksuar se fjalimi pason trazirat dhe dhunën në Valjevë, Beograd dhe Novi Sad ditët e mëparshme, Vuçiç tha se do të fillonte dhe do të përfundonte me historinë e drejtësisë:
“Pranoj, nuk ka pasur shërbime mediatike ‘okupuese’ që do ta shfrytëzonin këtë në periudhën e kaluar, siç po bëjmë sot në Serbi, kur 16 persona vdiqën në zjarre të ndryshme në Novi Sad, ku fajësia ishte drejtpërdrejtë njerëzore, faj i qartë, më i drejtpërdrejtë i mundshëm, i paanshëm, i qeverisjes lokale dhe të tjerëve. Është interesante që nuk e keni dëgjuar fjalën ‘drejtësi’ në shumë vende, le të themi në një vend katër herë më të vogël se yni, siç është Maqedonia e Veriut, ku katër herë më shumë njerëz vdiqën në një vend ku fajësia ishte drejtpërdrejtë njerëzore, lehtësisht e provueshme. Pse e dëgjuam këtë në Serbi? E dëgjuam sepse u përdor si armë dhe municion në luftën kundër një vendi të lirë, sovran dhe të pavarur.”
Vuçiç vazhdoi me shpjegimin e tij për kërkimin e drejtësisë për 16 viktimat pas shembjes së mbulesës në stacionin hekurudhor të rinovuar në Novi Sad, duke pretenduar se “gjithçka filloi me ato tregime romantike, nostalgjike për fëmijët tanë, nxënësit tanë, të rinjtë tanë, të ardhmen tonë”.
“Edhe pse ende nuk jemi plotësisht të sigurt se çfarë saktësisht ndodhi, e aq më pak jam i sigurt se e dinë ata që duan ta reduktojnë gjithçka në politikë dhe të ndjekin penalisht ata që i kanë ndjekur deri tani për çështje të kompetencës. Por, sigurisht, drejtësia duhet të gjendet për ato 16 viktima, për të gjithë njerëzit e plagosur, për çdo lot të çdo prindi.”
Arsyetim:
I përballur me demonstrata masive në të gjithë Serbinë, që zgjasin tashmë nëntë muaj dhe ku kërkohet përgjegjësi për 16 viktimat nga shembja e mbulesës së stacionit hekurudhor të rinovuar në Novi Sad, presidenti i Serbisë Aleksandar Vuçiç në fjalimin e tij të fundit publik – që tashmë tradicionalisht zgjati mbi një orë – bëri një paralelizëm me tragjedinë në diskotekën “Puls” të Koçanit. Në zjarrin në Koçan humbën jetën 62 persona dhe rreth 200 u plagosën, të cilët ende janë në rehabilitim nga traumat.
Vuçiç, duke shtrembëruar faktet, pretendon se nuk është dëgjuar fjala “drejtësi” në shumë vende, si p.sh. në Maqedoninë e Veriut, “ku katër herë më shumë njerëz humbën jetën në një vend ku fajësia është drejtpërdrejtë njerëzore, lehtësisht e provueshme” – gjë që është e pavërtetë.
Përtej obsesionit dhe spin-eve të presidentit serb Vuçiç me të ashtuquajturin “skenar maqedonas” që sipas tij duhet ta rrëzojë nga pushteti, kërkimi i drejtësisë për viktimat e zjarrit në diskotekën e Koçanit nuk është ndalur. Përkundrazi./Meta.mk
