Në shtëpinë e Atalantës këtë sezon ëndërronin për gjëra të mëdha, në një pikë shiheshin edhe si favoritë për të fituar titullin në Serie A, por dy humbjet radhazi kundër Fiorentinës dhe Interit nxorën nga loja ekipin e Gjimshitit, 9 pikë larg nga kreu 8 javë përpara fundit e bëjnë thuajse të pamundur arritjen e këtij objektivi. Më shumë se sa për titullin, në këtë fund sezoni, tek Atalanta shqetësohen për dy gjëra, të sigurojnë prezencën në Champions League pasi ekipi si Bologna apo Juventus po i ushtrojnë presion nga pranë, dhe mbi të gjitha të kuptojnë se çfarë plani ka për të ardhmen trajneri i tyre, Gasperini.
Vetë presidenti i Atalantës u shfaq i pa qartë në lidhje me këtë pjesë, thjesht shpreson që Gasperini të rrijë ende në krye të ekipit të tij. Gasperini është zot i fatit të tij, në fund të këtij sezoni do të vendos vetë nëse do të qëndrojë tek Atalanta apo do të largohet.
Prej kohësh tekniku “azzurr” ndiqet nga ekipe si Napoli, Juventus, por mbi të gjitha nga Roma. Pak ditë më parë, Ranieri, trajneri aktual i Romës, u shpreh i bindur se Gasperini nuk do të jetë trajneri i ardhshëm i ekipit verdhekuq, por mediat nuk e besojnë këtë version, madje shkojnë deri aty sa kanë zbuluar planin e Gasperinit nëse do të zbarkojë në kryeqytetit.
Nëse vjen Gasperini te Roma atëherë do të ketë një revolucion, priten të largohen lojtarë si Dybala, Dovbyk, Pellegrini, Hummels, Paredes etj. Për Romën do të jetë viti zero, viti në të cilin do të ri formatojnë ekipin për ta rikthyer shpejt konkurrues në Serie A.
(BalkanWeb)
