Ministri i Shëndetësisë, Arben Taravari, ka ndarë një mesazh sensibilizues me rastin e Ditës Botërore të Ndërgjegjësimit për Autizmin. Ai theksoi rëndësinë e mirëkuptimit dhe pranimit të personave me autizëm, duke sjellë një histori prekëse nga përvoja e tij si mjek.
“Më kujtohet një nënë që më tha: ‘Mendova se nuk mund ta kuptoja plotësisht, por tani e di që momentet e qeta dhe gjestet e tij të vogla janë mënyra e tij për të më thënë se më do’,” ka treguar Taravari.
Sipas tij, çdo person ka mënyrën e tij unike të lidhjes me botën, dhe prandaj shoqëria duhet të bëjë hapa konkretë drejt përfshirjes dhe mirëkuptimit. “Diversiteti ynë nuk na bën më pak të vlefshëm, por përkundrazi, na jep mundësinë të pasurojmë historinë tonë të përbashkët,” u shpreh ministri.
Ai theksoi se çdo veprim në këtë drejtim, sado i vogël, ka një rëndësi të madhe në krijimin e një mjedisi më të hapur dhe mbështetës për personat me autizëm.
