Problemi i shtyllave elektrike po vazhdon të jetë shqetësim për disa nga banorët e fshatrave të Komunës së Gjakovës.
Një ndër fshatrat ku gjendja e shtyllave elektrike është problematike është fshati Doblibare, ku sipas banorëve të zonës gjendja e këtyre shtyllave po paraqet rrezik për sigurinë e banorëve.
Disa nga banorët thanë që ankesat më të mëdha i kanë rreth problemeve me energjinë elektrike.
“Rryma vie në gjendje shumë të keqe, ndodh që më shumë jemi pa rrymë se sa me rrymë. Shtyllat elektrike janë në gjendje shumë të keqe, edhe pse na kanë premtuar që këto shtylla do të rregullohen, kjo gjë ende nuk ka ndodhur.”
Tutje banorët thanë që si shkak i gjendjes në të cilën janë këto shtylla elektrike, mund të paraqitet edhe një rrezik për sigurinë e banorëve të zonës.
“Nëse ndodh që të rrëzohen njëra nga shtyllat elektrike, ajo mund të bie mbi kulmin e njërës nga shtëpive në afërsi, gjë e cila mund të dërgojë deri në djegien e një shtëpie.”
Ndër të tjera banorët thanë që këto shtylla elektrike ka më shumë se 30 vite që nuk janë ndërruar. /Telegrafi/
