Prokurori i Përgjithshëm i Perusë paraqiti të hënën në Kongres apelin kundër Presidentes Dina Bolluarte në çështjen e quajtur “Rolex-gate”.
“Prokuroria e Përgjithshme paraqiti një apel kushtetues kundër Dina Boluarte, pasi dyshohet se ka kryer krimin e korrupsionit pasiv, në dëm të shtetit”, thuhet në një deklaratë të institucionit. Në parlament, i cili dominohet nga partitë e krahut të djathtë dhe të ekstremit të djathtë që në përgjithësi mbështesin zonjën Boluarte, apeli në parim do të duhet të shqyrtohet nga një nënkomision përgjegjës për ngritjen e akuzave sipas Kushtetutës, përpara se të vendoset — nëse është vënë — për debat dhe votim në seancë plenare. Afati kohor është i paqartë në këtë fazë.
Edhe nëse kundër saj ngrihen kallëzime penale, presidentja, sipas Ligjit Bazë, nuk do të gjykohet deri pas korrikut të vitit 2026, pra pas përfundimit të mandatit të saj. Dina Boluarte është përballur që prej muajit mars me një skandal të shkaktuar nga dalja e saj në publik me orët e shtrenjta të padeklaruara, një rast i quajtur “Rolex -gate” nga shtypi. Hetimi u zgjerua duke përfshirë posedimin e bizhuterive dhe depozitave bankare.
Presidentja u thirr dhe dëshmoi dy herë te prokurorët e ngarkuar me hetimin e pasurisë së supozuar të fituar pa leje, pasi sendet dhe burimet e luksit nuk ishin përfshirë në deklaratat e pasurisë që ajo duhej të dorëzonte. Ajo akuzohet edhe për korrupsion pasiv. Në fund të marsit, rezidenca e saj private dhe zyra e saj në presidencë u kontrolluan nga policia dhe prokurorët. Pas kontrolleve, tre orë dhe një byzylyk u sekuestruan nga autoritetet. Presidentja Boluarte pranoi, duke dëshmuar para prokurorëve, se bëri një “gabim” duke pranuar orët e shtrenjta që ajo tha se i kishte huazuar nga “miku i saj”, prefekti i Ayacucho, duke shtuar se që atëherë ia ka kthyer ato.
Presidentja, 61 vjeçe, po përballet 15 ditët e fundit me një skandal të ri, ku protagonist është vëllai i saj i madh, Nicanor Boluarte. Ai dyshohet se ishte kreu i një rrjeti korrupsioni që emëronte zyrtarë për ryshfet, duke përfituar nga pushteti i motrës së tij. Dina Boluarte, popullariteti i së cilës ka rënë, është përballur me katër procedura pezullimi dhe largimi, tre nga një fraksion pakicë i së majtës. Megjithatë, asnjëri prej tyre nuk arriti në pikën e diskutimit në seancën plenare të delegacionit kombëtar peruan.
(BalkanWeb)
