Volodymyr Zelensky ka bërë thirrje për një “qëndrim të qartë” nga Donald Trump mbi një paketë sanksionesh për Rusinë dhe garanci sigurie për Ukrainën për të ndaluar Vladimir Putinin dhe për t’i dhënë fund luftës.
Në një intervistë për Sky News, presidenti ukrainas tha se e vetmja mënyrë për të ndaluar luftimet është që së pari të vendosen garanci të përcaktuara sigurie.
Dhe kjo, tha ai, mund të ndodhë vetëm nëse zoti Trump do të ishte i guximshëm.
Ai i tha Sky News se shpreson që kryeministri i Mbretërisë së Bashkuar, Sir Keir Starmer, do të shqyrtojë detajet e sigurimit të së ardhmes së Ukrainës me presidentin gjatë vizitës së tij shtetërore në Britani këtë javë.
Ai tha: “Shpresoj shumë që ai (Starmer) do të jetë në gjendje të zhvillojë një diskutim shumë specifik mbi garancitë e sigurisë së SHBA-së për Ukrainën”.
“Para se të përfundojmë luftën, dua vërtet të kem të gjitha marrëveshjet në vend. Dua të… kem një dokument që mbështetet nga SHBA-ja dhe të gjithë partnerët evropianë. Kjo është shumë e rëndësishme”.
“Për ta bërë këtë të ndodhë, na duhet një qëndrim i qartë i presidentit Trump”.
Zelensky i kërkoi gjithashtu udhëheqësit amerikan të ndërmarrë “hapa të fortë personalë” për të “ndaluar Putinin”, pasi zoti Trump u kërkoi aleatëve të NATO-s të ndalojnë blerjen e naftës ruse dhe të vendosin tarifa ndaj Kinës për të ushtruar presion mbi Moskën.
“Unë besoj se SHBA-të janë mjaft të forta për të marrë vendime”, tha ai. “Unë besoj se Donald Trump mund të na japë sisteme të mbrojtjes ajrore në sasi dhe SHBA-të kanë mjaftueshëm”.
“Jam i sigurt se SHBA-të mund të aplikojnë sanksione të mjaftueshme për të dëmtuar ekonominë ruse, plus Donald Trump ka forcë të mjaftueshme për ta bërë Putinin të ketë frikë prej tij”.
“Evropa ka prezantuar tashmë 18 paketa sanksionesh kundër Rusisë. Dhe e tëra që mungon tani është një paketë e fortë sanksionesh nga SHBA-të”.
Ndërsa u përhap lajmi se aeroplanët luftarakë britanikë po fluturonin në misione të mbrojtjes ajrore mbi Poloni pas një ndërhyrjeje ruse me dron, udhëheqësi ukrainas u pyet se çfarë mesazhi mendonte se Putini po u dërgonte evropianëve.
“Ai po teston NATO-n”, tha ai. “Ai dëshiron të shohë se për çfarë është gati NATO, për çfarë janë të aftë, si diplomatikisht ashtu edhe politikisht, dhe si do t’i përgjigjet popullsia lokale kësaj”.
“Gjithashtu, sipas mendimit tim, mesazhi tjetër që ata po dërgojnë është, ‘mos guxoni t’i jepni Ukrainës sisteme shtesë të mbrojtjes ajrore, sepse mund t’ju duhen vetë’”.
