Gjashtëdhjtë jetë të humbura. Shumëfish dhimbje, lot dhe mallëngjim. Familjarët e viktimave në Koçan, përmes një marshi protestues kërkojnë drejtësi për fëmijët e tyre. Dhjetëra qytetarë në Koçan të veshur me të zeza, ju bashkuan protestës, të cilën kishin vendosur ta bënin të qetë, por me pankarta që flisnin më shumë se heshtja e tyre: “Kjo nuk është fatkeqësi, kjo është vrasje”, “Sistemi i korruptuar, po i vret fëmijët tanë”, “Stop drejtësisë selektive”, “Vrasës”, “Marsh për 59 engjujt tanë”, shkruhej në pankartat që mbanin në duar, krahas fotografive të disa prej atyre që ndërrun jetë natën e kobshme.
Protesta nisi në qendër të Koçanit, pastaj vazhdoi përreth kafenesë së pronarit të diskotekës “Puls”, aty u ndalën dhe heshtën për nderë të viktimave. Më pas vazhduan tek komuna e Koçanit, tek stacioni policor i këtij qyteti si dhe te Gjykata Themelore.
Në orët e hershme të mëngjesit të 16 marsit, pas një zjarri të madh në diskotekën “Puls” në Koçan mbetën të vdekur 59 persona, kurse u lënduaan rreth 200 të tjerë, të cilët u vendosën nëpër spitalet e Shkupit, Shtipit dhe Koçanit. Të nesërmen pjesa më e madhe e pacientëve nisën të transportohen në shtete të huaja dhe pacientët që mbetën këtu të gjithë u hospitalizuan në spitalet e Shkupit. Pas dy javësh, nisi kthimi i pacientëve të shëruar në vend. Derisa një pjesë e pacientëve po shëroheshin e lëshoheshin në shtëpi, njëri nga të lënduarit, menaxheri i diskotekës Aleksandar Karadakovski, ndërroi jetë gjatë kurimit të tij në Lituani, duke e çuar numrin e të vekurve nga kjo tragjedi në 60.
Ministria e Brendshme deri tani ka arrestuar 31 persona, nga 34 të dyshuar në këtë rast. Ajo që dihet deri tani është se diskoteka ka pas vetëm një derë, dhe nuk ka pasur as derë emergjente, por as ndonjë mjet tjetër kundër zjarrit, ndërsa ndërtimi i objektit, sidomos kulmi, ka qenë nga mjete që përfshihen lehtë nga zjarri, gjë që ka bërë që të gjitha viktimat të vdesin nga tymi që kanë thithur dhe jo nga djegjet që kanë kapluar trupin e tyre, të cilën e konfirmoi autopsia e tyre.
Emine Ismaili Luzha /SHENJA/
