Kryeministri Hristijan Mickoski deklaroi sot në Strumicë se, pas fitores së pritur të VMRO-DPMNE-së në zgjedhjet lokale, do të ishte logjike të mendohet për mundësinë e mbajtjes së zgjedhjeve të parakohshme parlamentare dhe për një mandat të ri katërvjeçar. Megjithatë, siç theksoi ai, vendimi për këtë çështje nuk do të merret për arsye politike, por në interes të shtetit.
HRISTIJAN MICKOSKI, KRYEMINISTËR
“Pres që pas këtyre zgjedhjeve lokale të hyjmë në një cikël të fuqishëm investimesh…. Prandaj, është logjike të mendohet për zgjedhje të parakohshme parlamentare, për të siguruar një mandat të ri katërvjeçar. Nëse e shohim këtë si një vendim politik, do të pajtohesha, por nëse e shohim nga këndvështrimi shtetëror, atëherë mendojmë ndryshe”.
Mickoski tha se ata duan ta vënë shtetin para së gjithash, si dhe interesin e biznesmenëve, në mënyrë që të kenë një të ardhme të parashikueshme, të dinë çfarë të prisni, e më pas të mendojnë për interesin e tyre politik.
“Por, do të shohim. Së pari të ndodhin ngjarjet, pastaj do të marrim vendime”, theksoi ai.
Kjo është hera e parë që kryeministri Hristijan Mickoski pohon se mund të ketë zgjedhje të parakohshme parlamentare. Opozita shqiptare ka kohë që kërkon zgjedhje të parakohshme parlamentare, ndërsa Mickoski dhe partnerët e tij në qeverii ghjithnë e kanë mohuar një gjë të tillë. /SHENJA/
