Në sallën e madhe të gjykatës në “Idrizovë” vazhdon seanca e re për zjarrin në diskotekën “Puls” në Koçan. Po vazhdon dëgjimi i dëshmitarëve të Prokurorisë. Disa prej tyre nuk paraqiten në gjykim, siç thonë, për shkak të lëndimeve të rënda, por edhe pamundësisë për t’u përballur sërish me 16 marsin tragjik. Trupi gjykues ka paralajmëruar se si arsyetim do të pranohet vetëm dëshmi mjekësore për mungesë, përndryshe do të sillen me urdhër.
Menaxheri formal i “Puls”, tashmë i ndjeri Aleksandar Karadakoski dhe Mihajlo, djali i Dejan Jovanov, kanë qenë miq, ndërsa Karadakoski, për shkak të Mihajlos, ishte kthyer nga Shkupi në Koçan për të punuar në “Klasik” si kamerier. Kjo ishte pjesë e dëshmisë së babait të Aleksandrit, i cili shtoi se djali i tij nuk kishte punuar kurrë në “Puls”. Dëshmitari u shpreh i befasuar kur mësoi se djali i tij figuron si menaxher.
Ishte paralajmëruar edhe një dëshmitar tjetër, por Prokuroria nuk kishte marrë njoftim nëse mungesa e tij është e arsyetuar apo jo.
Prindërit e viktimave këtë mëngjes protestuan para Institutit për Mjekësi Ligjore, duke kërkuar rezultatet e analizave toksikologjike nga autopsitë.
