Ukraina ka ndërmarrë për të tretën natë radhazi sulme me dronë kundër Moskës, duke shkaktuar pezullime të përkohshme në funksionimin e aeroporteve të kryeqytetit rus.
Sipas Ministrisë ruse të Mbrojtjes, mbrojtja ajrore rrëzoi 57 dronë ukrainas gjatë një periudhe tre-orëshe të mbrëmjes së së martës, mes tyre katër në periferi të Moskës dhe tetë të tjerë në rajonet përreth. Për muaj të tërë, ushtria ukrainase ka zhvilluar sulme me dronë me rreze të gjatë veprimi ndaj Moskës dhe zonave të tjera ruse, duke deklaruar se objektivi i tyre janë strukturat ushtarake dhe industriale.
Agjencia ruse e aviacionit civil, Rosaviatsiya, njoftoi se aeroportet Domodedovo dhe Zhukovsky u mbyllën përkohësisht për arsye sigurie.
Kryebashkiaku i Moskës, Sergei Sobyanin, shkroi në Telegram se ekipet e emergjencës kishin ndërhyrë në zonën ku ishin rrëzuar mbeturinat e një droni ukrainas që po afrohej drejt qytetit. Deri tani nuk janë raportuar viktima apo dëme të konsiderueshme.
Autoritetet ruse zakonisht nuk publikojnë informacion të detajuar mbi pasojat e sulmeve ukrainase, përveç rasteve kur raportohen viktima ose dëme ndaj objekteve civile. Në dy netët e kaluara, Ministria e Mbrojtjes së Rusisë njoftoi rrëzimin e 35 dronëve të tjerë që synonin Moskën, pa raportuar dëme materiale.
