Kryeministri indian Narendra Modi do të zbarkojë këtë fundjavë në Kinë për vizitën e tij të parë pas shtatë vitesh – një udhëtim që e vendos atë përballë presidentit kinez Xi Jinping dhe atij rus Vladimir Putin, në një moment kur marrëdhëniet Indi–SHBA kanë hyrë në krizë.
Modi do të marrë pjesë në një samit rajonal sigurie në Tianjin, vetëm disa ditë pasi Shtetet e Bashkuara dyfishuan tarifat për eksportet indiane në 50%.
Washingtoni e justifikoi këtë vendim me refuzimin e Nju Delhit për të ndalur blerjet e naftës ruse.
Përplasja ka minuar vite të tëra bashkëpunimi të thelluar mes Indisë dhe SHBA-së, të ndërtuar mbi teknologjinë dhe synimin e përbashkët për të balancuar ndikimin global të Kinës.
“Besimi i Indisë te SHBA është shkatërruar,” tha analisti i Azisë Jugore Michael Kugelman. “Nuk jam i sigurt nëse zyrtarët amerikanë e kuptojnë sa shumë kapital besimi kanë humbur në kaq pak kohë.”
Për Kinën, samiti dyditor i Organizatës së Bashkëpunimit të Shangait që nis të dielën vjen në momentin më të përshtatshëm. “Modi do të jetë në Kinë pikërisht kur marrëdhëniet Indi–Kinë po stabilizohen dhe ato Indi–SHBA janë përkeqësuar. Është një pamje e fuqishme,” shtoi Kugelman.
Ekspertë të tjerë theksojnë se Pekini po shfrytëzon me kënaqësi tensionet tregtare mes Nju Delhit dhe Washingtonit. Nga ana tjetër, Putin pritet të përdorë samitin për të riafirmuar aleancën e ngushtë me Indinë. “Është një moment i artë për t’i treguar Washingtonit se nuk ka kontroll mbi të gjithë,” shtoi Kugelman.
Sipas SHBA-së, vazhdimi i blerjes së naftës dhe armatimeve ruse nga India ndihmon në financimin e luftës së Moskës në Ukrainë. Goditja ekonomike është e madhe: SHBA është tregu më i madh i eksporteve indiane, me rreth 86.5 miliardë dollarë në vit. Dy të tretat e kësaj shume – afërsisht 60.2 miliardë dollarë në mallra – janë tani të prekura nga tarifat e reja, duke goditur sektorë të ndjeshëm si tekstilet dhe bizhuteritë.
Edhe para vendosjes së tarifave, India kishte filluar të shihte nga Kina si burim investimesh, teknologjie dhe mundësi tregtare. Marrëdhëniet mes dy vendeve ishin ngrirë pas përplasjes vdekjeprurëse në kufirin Himalajas në vitin 2020, por nisën të zbuten kur Modi dhe Xi u takuan pas katër vitesh gjatë samitit të Brics në Rusi, tetorin e kaluar.
Tani, kriza me SHBA-në i ka dhënë Modit një arsye të fortë për të përshpejtuar afrimin me Pekinin.
