Një 16-vjeçar shqiptar ka mbetur i plagosur rëndë pas një sulmi me thikë të ndodhur në orët e vona të së shtunës, në zonën Via Cattaneo. Sipas informacioneve paraprake, adoleshenti është goditur në kraharor nga një bashkëmoshatar, ndërsa motivet e ngjarjes mbeten ende të paqarta.
Një nga pistat kryesore që po hetohet nga autoritetet italiane është ajo e një tentative për grabitje që ka përfunduar në përplasje të dhunshme. Megjithatë, nuk përjashtohen ende pista të tjera.
I riu u transportua me urgjencë në spital dhe aktualisht ndodhet në repartin e terapisë intensive pediatrike, në gjendje të rëndë por jashtë rrezikut për jetën. Sipas burimeve mjekësore, ai ka një shtat të fuqishëm, me gjatësi rreth 1.90 metra dhe peshë 80 kilogramë.
Hetimet janë në vijim dhe janë duke u udhëhequr nga forcat e rendit, të cilat po punojnë për të rindërtuar me saktësi dinamikën e incidentit. Deri tani, 16-vjeçari ka treguar hezitim për të bashkëpunuar me hetuesit dhe nuk ka ofruar ende informacione të detajuara për rrethanat e ngjarjes.
Policia ka nisur grumbullimin e dëshmive nga vendi i ngjarjes si dhe verifikimin e pamjeve të kamerave të sigurisë në zonë, me qëllim identifikimin e autorit të sulmit.
