Agjencia Kombëtare e Mjedisit ka gjobitur me 500 mijë lekë kryetarin e Bashkisë së Poliçanit, Adriatik Zotkaj. Gjoba ndaj kryetarit të bashkisë parashikohet nga ligji “Për menaxhimin e mbetjeve”, i cili është miratuar që në vitin 2011.
Zotkaj është kryebashkiaku i dytë që gjobitet për keqmenaxhimin e mbetjeve pas ndëshkimit të kryetarit të Malësisë së Madhe, Tonin Marinaj.
“Grupi i inspektimit, pasi realizoi inspektimin, e hartoi procesverbalin e inspektimit në datë 01/02/2022 dhe e njoftoi në datë 01/02/2022 . Në bazë të procesverbalit të inspektimit dhe kontestimeve të subjektit të inspektimit rezultuan këto shkelje të kërkesave ligjore: Ligji Nr 10463, date 22.09.2011 ” Per Menaxhimin e Integruar te Mbetjeve ” Neni 21 Pika 12,”– njofton AKM.
Vetëm pak kohë më parë, kryeministri Edi Rama mblodhi kryebashkiakët që t’i japin prioritet sa i përket fondeve pastrimit të mbetjeve, duke i paralajmëruar se në të kundërt ndaj tyre do të ketë “ndëshkime”. Kreu i qeverisë, i ka paralajmëruar se nuk do t’u miratohen buxhetet për vitin 2022.
