Rusia njoftoi sot se ka thirrur ambasadorin e saj në Armeni për konsultime, në shenjë proteste ndaj afrore të këtij vendi me Bashkimin Evropian, përpara zgjedhjeve të 7 qershorit. Edhe pse formalisht është aleate me Rusinë, vendi kaukazian me rreth 3 milionë banorë ka thelluar lidhjet me Perëndimin në vitet e fundit, pavarësisht varësisë së saj ekonomike nga Moska.
„Ambasadori i Federatës Ruse në Republikën e Armenisë, S.P. Kopyrkin, është thirrur në Moskë për konsultime lidhur me hapat e ndërmarrë nga udhëheqja armene drejt rreshtimit me Bashkimin Evropian“, thuhet në deklaratën e Ministrisë së Punëve të Jashtme të Rusisë lidhur me ambasadorin Sergei Kopyrkin.
Unioni Ekonomik i ish-republikave sovjetike i udhëhequr nga Rusia deklaroi dje se do të shqyrtojë pezullimin e Armenisë për shkak të kërkesës së saj për anëtarësim në BE dhe i bëri thirrje Jerevanit të mbajë një referendum.
Anketat për zgjedhjet e qershorit tregojnë se partia e kryeministrit properëndimor, Nikol Pashinyan, do të jetë përpara opozitës proruse. Presidenti amerikan Donald Trump ka mbështetur Pashinyan-in, i cili erdhi në pushtet përmes një revolucioni në vitin 2018 dhe u rizgjodh në vitin 2021. Armenia pretendon se Rusia dështoi ta mbronte atë gjatë luftimeve me Azerbajxhanin fqinj, me të cilin ka pasur një konflikt të gjatë për Nagorno-Karabakhun — një ish-rajon shkëputës me popullsi etnike armene, të cilin Azerbajxhani e riktheu nën kontroll në vitin 2023.
