Specialistët e Komisariatit të Policisë Korçë kanë arrestuar në flagrancë drejtuesin teknik të një fabrike letre, shtetasin Th. Zh., 59 vjeç, pas një aksidenti që ndodhi gjatë orarit të punës.
Sipas njoftimit zyrtar të policisë, një punonjëse e fabrikës pësoi dëmtime në gishta gjatë përdorimit të një makinerie, çka kërkoi ndërhyrje të menjëhershme mjekësore. Fatmirësisht, pas marrjes së ndihmës së nevojshme, punonjësja ndodhet jashtë rrezikut për jetën.
Drejtuesi teknik i fabrikës po hetohet për shkelje të rregullave të mbrojtjes në punë, një akuzë që ngrihet në raste kur nuk respektohen standardet e sigurisë që synojnë të mbrojnë shëndetin dhe jetën e punonjësve. Autoritetet kanë nisur hetimet për zbardhjen e plotë të rrethanave të ngjarjes.
Njoftimi i policisë:
Specialistët për Hetimin e Krimeve të Komisariatit të Policisë Korçë arrestuan në flagrancë për veprën penale “Shkelja e rregullave të mbrojtjes në punë”, shtetasin Th. Zh., 59 vjeç, banues në Korçë, drejtues teknik në një fabrikë letre, pasi një punonjëse e fabrikës, duke punuar me një makineri, ka dëmtuar gishtat e dorës. E dëmtuara mori mjekim dhe është jashtë rrezikut për jetën.
