Sipas raportit të publikuar për punën njëvjeçare të Kryetarit të Kuvendit Afrim Gashi, diplomacia parlamentare ka qenë në qendër të agjendës institucionale të Kuvendit gjatë vitit të parë të mandatit të ri.
Sipas këtij raporti zyrtar, janë realizuar 14 vizita zyrtare në kryqendra të rëndësishme botërore dhe europiane ndërsa janë zhvilluar rreth 178 takime me delegacione e ambasadorë.
Përveç këtyre, janë organizuar gjashtë pritje solemne për homolog dhe krerë shtetesh.
Deri sa prezantoi raportin në një press konferencë për media, pak ditë më parë, Gashi këto numra i cilësoi si angazhim për ta vendosur Kuvendin në një pozicion më aktiv dhe një partner të denjë në skenën ndërkombëtare.
Për më tepër diplomacinë parlamentare dhe këto vizita, ai i komentoi si një përpjekje për të ndihmuar procesin integrues duke kërkuar mbështetje nga partnerët ndërkombëtar.
“Të gjithë e dijmë problemin që e kemi me fqiun tonë, Bullgarinë, dhe paparashikueshmërin e çështjeve që ata i hapin në raport me elementet identitare me bashkëqytetarët tanë maqedonsas, që natyrisht implikojnë të gjithë qytetarët dhe shtetin. Por si Kuvend, edhe unë si kryetrar, nuk kemi qëndruar duar kryq. Diplomacia parlamentare, ju e patë se kemi pasur një agjendë të ngjeshur të vizitave në qendrat kryesore Europiane, me qëllim që të përgatisim dhe të kërkojmë ndihmë nga aleatët tanë që ta tejkalojmë këtë pengesë. Pra iu kemi thënë që ne jemi të gatshëm të votojmë ndryshimet kushtetuese vetëm na duhet një parashikueshmëri në proces. Sepse kemi frikë që të mos kemi një bllokadë tjetër pas kësaj për çështje identitare. Duam të jemi të sigurtë që procesi nuk do të bilateralizohet dhe do mbetet në korniza të kritereve të Kopenhagës”, theksoi Gashi.
