Një vit pas tragjedisë në diskotekën “Puls” në Koçan, familjet e viktimave ende nuk kanë përgjigje për shkaqet e vdekjes së më të dashurve të tyre.
Këtë e theksoi Aleksandar Naunov, një prind që ka humbur vajzën e tij, duke folur në emër të Shoqatës “16 Mars 2025” – Koçan.
Ai theksoi se që më 14 janar të këtij viti ishte dërguar një kërkesë zyrtare në Institutin e Mjekësisë Ligjore pranë UKIM-it, me qëllim që të merren informacione të qarta nëse janë kryer analiza toksikologjike, përfshirë edhe testimin për praninë e cianideve. Pavarësisht dy muajve të kaluar, siç tha ai, nuk është marrë përgjigje.
Naunov theksoi se familjet më herët kishin kërkuar edhe takim me përfaqësues të mjekësisë ligjore, por në vend të përgjigjeve konkrete, kishin marrë një premtim për sqarime shtesë, i cili sipas tij nuk është përmbushur.
Gjithashtu, nga Fakulteti i Shkencave Natyrore dhe Matematikore ishte konfirmuar se, me urdhër të Prokurorisë në Koçan, është përgatitur një raport ekspertize, por pa informacionet kyçe nëse janë analizuar substanca toksike dhe çfarë tregojnë rezultatet.
Sipas Naunov, institucionet ia kalojnë përgjegjësinë njëra-tjetrës, ndërsa familjet mbeten pa përgjigje.
Ai kujtoi edhe procesin e dhimbshëm të autopsisë, kur trupat e viktimave u dërguan në Shkup, me sigurinë se do të përcaktohej shkaku i vërtetë i vdekjes. Në vend të kësaj, familjet pritën me ditë pa mundësi për t’u përshëndetur me dinjitet, ndërsa edhe sot, siç tha ai, nuk kanë informacion të plotë për atë që është analizuar dhe cilat janë rezultatet.
“Kjo nuk është vetëm heshtje institucionale, por çështje e humanizmit dhe përgjegjësisë”, theksoi Naunov, duke akuzuar për fshehje të informacionit nga familjet që kanë të drejtë për të vërtetën.
