Për katër muaj, 110 mjekë braktisën Maqedoninë

Vetëm nga janari e deri në prill të këtij viti 110 mjekë të vendit kanë kërkuar leje për të ushtruar profesionin e tyre jashtë Maqedonisë. Të dhënat e Odës së Mjekëve janë tronditëse, të cilat tregojnë se gjatë shtatë viteve të kaluara përfshirë edhe katër mujorëshin e 2018-tës numri i mjekëve që kanë braktisur vendin ka shkuar në 1207.
Kështu, në vitin 2010 numri i mjekëve që kanë lëshuar vendin ka qenë 72, në 2011-tën ky numër ka shkuar në 127, një vit më vonë në 138 ka mbërri numri i mjekeve që braktisën Maqedoninë, e ndërsa në 2013-tën numri i të licencuarve për mjekësi ka kaluar në 157. Gjatë vitit 2014, 108 nga mjekët vendorë kanë dalë jashtë territorit të Maqedonisë, ndërkaq në 2015 ky numër është rritur për 63. Në vitin 2016 është paraqitur gjendje e ngjashme ndërkaq në 2017 ka pasur rënie krahasuar me vitet e kaluara. Arsyet më kryesore për ikjen masive të mjekëve janë rrogat e ulëta dhe kushtet e rënda në Shëndetësinë Publike.
Nga Oda e Mjekëve thanë se kanë kërkuar nga ministria e Shëndetësisë që specializantët t’i punësojë nëpër vendet e tyre të banimit, me qëllim që kjo gjendje të gjejë përmirësim.