Maqedonia e Veriut vazhdon të mbetet në fund të rajonit dhe Evropës për nga paga minimale dhe mesatare, ndërsa partitë politike vazhdojnë me akuzat se kush ka kontribuar më shumë në varfërimin e qytetarëve, shkruan PressOnline.al.
Kryeministri Hristijan Mickoski, duke mos komentuar të dhënat se paga reale është ulur gjatë vitit të fundit, u fokusua te qeverisja shtatëvjeçare e LSDM-së dhe BDI-së. Ai deklaroi se rritja reale e pagës neto gjatë mandatit të LSDM-së ishte vetëm 3.5%, ndërsa një vit qeverisje e VMRO-DPMNE-së ka sjellë rritje prej 6.5%.
“Matematikisht, por edhe ndryshe, 6.5% është gati dyfish më shumë se 3.5%. Politikat selektive të LSDM-së sollën pasoja katastrofale për Maqedoninë, siç pamë gjatë shtatë viteve të fundit, por edhe për vetë partinë e tyre,” u shpreh Mickoski.
Nga LSDM reaguan duke kujtuar deklaratën e ministres së Financave, Gordana Dimitrieska-Koçoska, e cila tha se nuk ka “shkop magjik” për të ndalur inflacionin. Zëdhënësja e LSDM-së, Bogdanka Kuzeska, theksoi se sindikalistët raportojnë rritje të shportës minimale për gati 5.000 denarë në një vit, ndërsa paga minimale është rritur vetëm 1.800 denarë.
“Perimet janë shtrenjtuar për 63.3%, frutat për 33%, ndërsa inflacioni 4.8% po i gërryen të ardhurat e qytetarëve. Në qershor, paga reale u rrit vetëm me 3.8%, ndërsa me masat e LSDM-së rritja ishte mbi 11%. Për herë të parë pas një kohe të gjatë, kemi edhe rënie të pagës mesatare krahasuar me muajin e kaluar,” tha Kuzeska.
Ajo theksoi se vendet e rajonit si Serbia, Bullgaria dhe Kroacia kanë marrë masa të shpejta për çmimet dhe inflacionin, ndërsa sipas saj vetëm qytetarët e Maqedonisë janë lënë të përballen vetëm me krizën.
“Nuk duhet ‘shkop magjik’, duhet që VMRO-DPMNE dhe deputetët e saj të pranojnë propozimet tona për rritjen e pagës minimale në 500 euro, heqjen e TVSH-së për ushqim dhe rritjen e pagave në të gjitha sektorët. Pagat në Maqedoni janë vetëm 35% e mesatares evropiane, ndërsa çmimet arrijnë 60% të nivelit evropian,” theksoi Kuzeska.
Ajo akuzoi qeverinë se me vetëdije mban pagat e ulëta për t’i shërbyer elitave të biznesit të afërta me VMRO-DPMNE.
