Inspektorati i Gjuhës është lënë pa paga për pesë muaj me radhë, me qëllim që inspektorët të dorëhiqen vetë. Institucionet i refuzojnë inspektimet dhe, ndërkohë, përdorimi i gjuhës shqipe po zhbëhet sistematikisht, nga vulat zyrtare, te dokumentet dhe mbishkrimet publike. Kështu shkruan në një postim në profilin e tij në Facebook, ish-ministri i Punëve të Jashtme, Bujar Osmani, ndërsa shton se Qeveria po përgatitet për hapin e fundit: shuarjen përfundimtare e organit ekzekutiv për zbatimin e gjuhës, përmes heqjes së autonomisë dhe nënshtrimit të tij nën ministrin e Drejtësisë , i cili as nuk e njeh gjuhën shqipe si zyrtare.
“Ky është një sulm i qëllimshëm ndaj zbatimit të gjuhës shqipe dhe ndaj të gjitha arritjeve që janë garantuar me shumë mund dhe sakrificë”, shkruan Osmani.
