Kanadezët po shmangin udhëtimet drejt Shteteve të Bashkuara, duke vazhduar një trend që ka nisur që me ardhjen e Donald Trump në presidencë. Kristy Gammon, banore e Nova Scotia, tregon se nuk udhëton më në SHBA, madje as përmes këtij vendi për të shkuar në Ontario, një shkurtim për një udhëtim 18-orësh.
62-vjeçarja thotë se ajo dhe shumica e miqve të saj kanë vendosur të mos vizitojnë më SHBA –të si formë proteste ndaj politikave që nuk i mbështesin dhe ndaj masave tregtare që Trump ka vendosur ndaj Kanadasë.
“Ka kaq shumë gjëra që na tronditin mbi mënyrën se si administrata vepron ndërkombëtarisht, si i trajton qytetarët e vet dhe aleatët, përfshirë Kanadanë”, tha Gammon.
Të dhënat zyrtare tregojnë se tetori shënoi muajin e dhjetë me radhë të rënies së numrit të kanadezëve që vizitojnë SHBA-të. Fluturimet nga Kanadaja në SHBA ranë rreth 24%, ndërsa udhëtimet me makinë u ulën mbi 30% krahasuar me të njëjtën periudhë të vitit të kaluar, sipas Zyrës Statistikore të Kanadasë.
Në përgjithësi, shpenzimet ndërkombëtare në SHBA ranë 3.2%, kryesisht për shkak të numrit më të ulët të vizitorëve kanadezë, sipas Shoqatës Amerikane të Turizmit. Kanadezët, që më parë përbënin rreth një të katërtën e vizitorëve ndërkombëtarë në SHBA, duket se janë të vendosur t’i shmangen fqinjëve jugorë, sidomos pas tarifave të reja që Trump ka vendosur dhe komenteve të tij për Kanadanë si “shteti i 51-të”.
Disa destinacione turistike amerikane kanë provuar të tërheqin kanadezët përsëri, duke ofruar oferta dhe zbritje për vizitorët që kalojnë kufirin, si në Kalispell të Montanës, pranë Parkut Kombëtar Glacier.
Ndërkohë, bojkoti ka ndihmuar turizmin vendas në Kanada, i cili shënoi të ardhura rekorde prej 59 miliardë dollarësh kanadezë nga maji deri gushti 2025, kryesisht për shkak të udhëtimeve brenda vendit. Edhe shumë “snowbirds” kanadezë, pensionistë që zakonisht shkojnë në Florida gjatë dimrit, po qëndrojnë më shumë në Kanada, me vetëm 10% që planifikojnë udhëtime në SHBA këtë vit, një rënie prej 66% krahasuar me vitin e kaluar.
Gammon thotë se disa miq të saj madje kanë vendosur të shesin shtëpitë e tyre të dimrit në Florida për shkak të marrëdhënieve të acaruara me administratën Trump.
“Plani i tyre është ndryshuar krejtësisht. Ndihet një ndryshim”, shpjegon ajo.
Pavarësisht se i mungojnë udhëtimet në SHBA, Gammon thotë se për tani do të vazhdojë të qëndrojë jashtë këtij vendi, duke shtuar se ndryshime të mëdha do të duheshin për të ndryshuar vendimin e saj.
