Më lejoni fillimisht të theksoj se njoftimi për këtë masë, për të cilën do të flasim sot, ishte konferenca ime e parë për shtyp si zëdhënëse e Qeverisë, dhe sinqerisht jam krenare që sot mund të konfirmoj se një nga masat më të rëndësishme për të rinjtë, masa për vauçerë për pajisje elektronike për studentët, po realizohet shkëlqyeshëm dhe në përputhje me të gjitha dinamikat e parashikuara.
Sipas të dhënave të fundit, deri dje janë shpërndarë gjithsej 33.682 vauçerë me vlerë prej 15.300 denarësh.
Prej tyre, 11.500 studentë tashmë e kanë realizuar me sukses vauçerin dhe kanë marrë pajisjen e tyre të re elektronike.
Këto shifra tregojnë qartë se interesimi është i madh, zbatimi është stabil dhe masa krijon rezultate të vërteta.
Kjo masë nuk është e rastësishme apo e improvizuar, por e planifikuar me kujdes dhe me kohë nga Sekretariati i Përgjithshëm i Qeverisë, në bashkëpunim të ngushtë me Ministrinë e Transformimit Digjital dhe Ministrinë e Arsimit dhe Shkencës. Ky koordinim institucional mundësoi: organizim të shpejtë të procedurave, kritere të qarta për studentët, sistem teknikisht të harmonizuar për shpërndarjen dhe realizimin e vauçerëve dhe transparencë të lartë të procesit.
Me një sistem të vendosur mirë dhe bashkëpunim të fuqishëm ndërmjet institucioneve, masa u bë shembull se si shteti mund të ofrojë politika efikase, moderne dhe të përgjegjshme, të cilat ndikojnë drejtpërdrejt në përmirësimin e jetës së qytetarëve.
Qeveria tregoi se investimet në dije, teknologji dhe rini janë prioritet, ndërsa realizimi i këtij premtimi është dëshmi se shteti funksionon në shërbim të qytetarëve. E ulim pabarazinë digjitale dhe po e nxisim transformimin digjital.
Si Qeveri, do të vazhdojmë të ndjekim realizimin e masës nga tregtarët e autorizuar, të sigurojmë mbështetje të vazhdueshme për studentët dhe të përgatisim politika të reja të orientuara drejt digjitalizimit dhe modernizimit të arsimit.
Treguam se kur shteti planifikon me kujdes, të koordinuar dhe me një qëllim të qartë, rezultatet janë të dukshme dhe të prekshme. Masa funksionon, interesimi është i madh dhe presim që të gjithë studentët ta shfrytëzojnë atë maksimalisht. Zbatimi është shembull i një bashkëpunimi të suksesshëm ndërinstitucional.
youtube.com/live/YMF6Z3HIa5M?si=VOvOZznns-vKg9XG
