Kryeministri Hristijan Mickoski nuk pajtohet me propozimin e liderit të LSDM-së opozitare, Venko Filipçe që në Kuvend të miratojnë një rezolutë me “linja të kuqe” lidhur me çështjen e eurointegrimeve, me qëllim të zhbllokimit të situatës për shkak të bllokadës së Bullgarisë. Me rezolutën, do të parashikohej që nëse vendoset veto e re, Maqedonia e Veriut t’i braktisë bisedimet për anëtarësim në Bashkimin Evropian. Për Mickoskin, kjo është vetëm një dinakëri e re, pasi që ka pasur edhe më parë deklarata të tilla, por asnjëherë nuk janë respektuar pikërisht LSDM derisa ishte në pushtet.
“Do t’u kujtoj atyre se ata vetë kishin një deklaratë të tillë në Parlament, për të mos pranuar ultimatumet nga Sofja, për fat të keq ata pranuan gjithçka. Do t’ju kthej edhe më tej në kohën kur kishte edhe një deklaratë në Parlament kur nuk do të kishte ndryshim të emrit të vendit, gjithashtu të votuar nga deputetët e LSDM-së, kështu që ju e dini kur LSDM erdhi në Qeveri se çfarë u bë dhe çfarë po ndodhte kur u ndryshua emri i vendit. Do t’ju kujtoj gjithashtu se së pari ata do të respektonin rezultatet e Referendumit, dhe kur ai ishte i pasuksesshëm ata nuk i respektuan ato. Fundja, kjo është një çështje që duhet të udhëhiqet nga njerëz seriozë, me një vizion të qartë, me një strategji të qartë, kjo nuk është një lojë dinakërie. Pamë dinakët çfarë i bënë shtetit dhe qytetarëve, për shtatë vjet patëm mundësinë me atë lloj dinakërie, ku përfunduam… A ju kujtohet ai kujdes shëndetësor evropian, a ju kujtohet e gjithë ajo që u tha, asgjë nga këto nuk u realizua, sigurisht”, deklaroi Hristijan Mickoski, Kryeministër. /Alsat.mk
