Zv/kryeministri Izet Mexhiti ka deklaruar se qeveria është stabile, duke shtuar se mund të ketë mendime të ndryshme por se kanë kapacitet për të ulur dhe biseduar për t’i sqaruar gjërat.
Sa i përket ministrit për Administratë nga radhët e ZNAM, Goran Minçev i cili ka ndryshuar përqindjen e Balancuesit, me çka ulet përfaqësimi i shqiptarëve në administratë nga 29,52% në 24,30%, Mexhiti thotë se kjo nuk është në përputhje me ligjin.
“Mendoj se në lidhje me Balancuesin, ose atë që e tha ministri Minçev, mendoj se nuk është në përputhje me ligjin. Në ligj thuhet se përfaqësimi adekuat duhet të jetë sipas përfaqësimit adekuat të popullatës, nuk thuhet për rezidente ose jorezidente. Normalisht, iniciativa të tilla do të shkaktojnë përgjigje nga ana jonë, por ne nuk jemi ata që inicojnë një gjë të tillë. Ne jemi të përkushtuar në shtyllat e qeverisë, zhvillim ekonomik, standard jetësor, luftë kundër korrupsionit, eurointegrime, këto janë shtyllat tona”, tha Mexhiti, duke shtuar se edhe kolegët e tyre duhet të jenë në funksion të kësaj platforme e jo të politikës ditore.
