“Qeverisja nuk bëhet në zyrë, por në rrugë, në takime, sy më sy me qytetarët.” Kjo ishte porosia e zëvendëskryeministrit të parë, Izet Mexhiti gjatë një takimi me qytetarët e Çairit, ku u prezantua një nga iniciativat më të fuqishme për punësim në vend.
Në një atmosferë të ngrohtë bashkëbisedimi, Mexhiti theksoi se nuk është koha për premtime, por për veprim. Dhe veprimi ka nisur: është prezantuar plani për punësim me një fond rekord prej 40 milionë euro. Ky fond synon të krijojë mundësi reale për të rinjtë që kërkojnë të ndërtojnë të ardhmen e tyre në vend, për nënat që duan të rikthehen në tregun e punës, dhe për çdo qytetar që kërkon një mundësi të ndershme.
Krahasuar me vitin e kaluar, fondi është rritur me 7.5 milionë euro, çka nënkupton më shumë mbështetje dhe më shumë hapësira për zhvillim individual dhe ekonomik.
“Faleminderit për zemrën tuaj të madhe, Çair. Ju nuk prisni ndryshimin. Ju jeni vetë ndryshimi,” – përfundoi Mexhiti, duke nënvizuar se kjo është vetëm fillimi dhe se puna do të vazhdojë me përkushtim dhe energji të reja.(INA)
