Një nga iniciatorët e provimit të jurisprudencës në gjuhën shqipe në RMV, Mevlan Ademi, ka reaguar me një mesazh të fortë nga Tirana, duke theksuar vendosmërinë për realizimin e kërkesave të studentëve shqiptarë.
Ai ka deklaruar se kryeqyteti shqiptar mbetet vendi ku “identiteti na thërret dhe ku zëri ynë kumbon më fort se kudo”, duke nënvizuar rëndësinë e gjuhës shqipe si themel i përfaqësimit dhe barazisë.
“Është gjuha jonë! Është radha jonë për të folur dhe kemi qenë të qartë, e do të vazhdojmë të flasim vetë”, shkruan Ademi, duke shtuar se nuk do të ketë tërheqje nga kërkesat e tyre.
Ai thekson se rrugëtimi i nisur për njohjen e të drejtës për provimin e jurisprudencës në shqip do të vazhdojë me vendosmëri, ndërsa zgjidhja, sipas tij, është e pashmangshme dhe do të arrihet pa asnjë kompromis.
Mesazhi i tij është shoqëruar me thirrjen simbolike #NeFlasimVetë, duke reflektuar një mobilizim më të gjerë për të drejtat gjuhësore dhe akademike të shqiptarëve në vend.
