Studenti nga Tetova dhe një nga nismëtarët e nismës studentore për mundësimin e dhënies së provimit të jurisprudencës në gjuhën shqipe, Mevlan Ademi, ka shprehur falënderim publik ndaj Shqipërisë, si dhe ndaj Ambasadorit të Republikës së Shqipërisë në Shkup, Denion Meidani, për mbështetjen e dhënë ndaj kësaj kauze që ka mobilizuar studentët shqiptarë të drejtësisë.
Ai njëkohësisht ka bërë thirrje që nisma studentore të mbështetet nga të gjithë, pa përjashtim, duke e cilësuar atë si një çështje që lidhet drejtpërdrejt me garantimin e të drejtave dhe trajtimin e barabartë. Ademi nënvizon se solidarizimi i gjerë shoqëror dhe institucional është thelbësor për të siguruar standarde të drejta dhe respektim të të drejtave gjuhësore në proceset profesionale.
Në mesazhin e tij, ai ka ftuar opinionin publik që t’i bashkohen nismës, duke paralajmëruar se një e drejtë që sot duket e kufizuar për një grup të caktuar, nesër mund të vihet në rrezik për shumë të tjerë nëse mungon reagimi dhe angazhimi i përbashkët. Sipas tij, mbështetja ndaj kësaj nisme sot është një investim në mbrojtjen e të drejtave dhe barazisë për të ardhmen.
Nisma për provimin e jurisprudencës në gjuhën shqipe ka marrë jehonë të gjerë në opinionin publik, duke u shndërruar në një debat më të gjerë mbi zbatimin praktik të të drejtave gjuhësore dhe qasjen e barabartë në profesionet e rregulluara. Nismëtarët theksojnë se kërkesa e tyre nuk ka karakter politik, por është një kërkesë legjitime akademike dhe profesionale që synon të garantojë që vlerësimi të bazohet në njohuritë juridike dhe jo në pengesa gjuhësore.
Në përmbyllje, teksa ndan mendimin e autorit të kushtetutës së RMV, Ademi rithekson falënderimin ndaj Shqipërisë dhe Ambasadorit Meidani për mbështetjen, duke theksuar se bashkimi rreth kësaj nisme sot është kyç për të garantuar të drejtat dhe dinjitetin profesional të studentëve shqiptarë edhe në të ardhmen.
