Më shumë se 600 mijë njerëz në rajonin e Kievit të Ukrainës janë pa energji elektrike pas një sulmi gjatë natës nga Rusia, thanë zyrtarët. Ministria e Energjisë së Ukrainës tha se mbi 500 mijë prej tyre ishin në kryeqytet, ndërsa pjesa tjetër në rajonin përreth. Ajo e atribuoi humbjen e energjisë ndaj sulmeve me raketa dhe dronë mbi infrastrukturën energjetike në qytet dhe disa rajone të tjera.
Sipas BBC, rreth 36 raketa dhe gati 600 dronë u lëshuan mbi objektiva në mbarë Ukrainën të shtunën, thanë zyrtarët, duke vrarë tre persona dhe plagosur dhjetëra të tjerë.
Rusia ka intensifikuar sulmet ndaj infrastrukturës civile dhe energjetike të Ukrainës, pavarësisht përpjekjeve të udhëhequra nga SHBA për të siguruar një marrëveshje paqeje. Ministria e Mbrojtjes e Rusisë tha se kishte nisur “një sulm masiv… kundër ndërmarrjeve të kompleksit ushtarako-industrial ukrainas dhe objekteve energjetike që mbështesin funksionimin e tyre”.
Përveç infrastrukturës energjetike, disa ndërtesa banimi u goditën gjatë sulmeve të natës, thanë zyrtarët ukrainas.
Shpërthime të forta u dëgjuan në mbarë Kievin herët në mëngjesin e së shtunës. Shërbimet e emergjencës u panë më pas duke ndërhyrë në blloqe banimi të djegura.
Kryetari i Kievit, Vitali Klitschko, tha se një fëmijë 13-vjeçar ishte mes 29 personave të plagosur në qytet.
Forcat Ajrore të Ukrainës thanë se rrëzuan 558 nga dronët dhe 19 nga raketat.
Kryeqyteti ukrainas është ndër disa qytete që kanë pësuar bombardime ajrore të rregullta që nga fillimi i pushtimit të plotë të Ukrainës nga Rusia në shkurt 2022.
Shumë ukrainas kanë jetuar gjithashtu me ndërprerje të rregullta të energjisë, pasi Moska ka shënjestruar infrastrukturën energjetike edhe në dimrat e mëparshëm.
Të dielën parashikohet që temperatura në Kiev të bjerë në 2°C, ndërsa mesatarja e dhjetorit është nën zero.
Ukraina ka shënjestruar infrastrukturën energjetike ruse, përfshirë rafineritë e naftës dhe depot, veçanërisht me armë me rreze të gjatë që mund të godasin thellë brenda Rusisë. Ajo thotë se kjo bëhet për të kufizuar të ardhurat e Moskës nga eksporti kryesor i saj, që financojnë përpjekjet e luftës.
