Kompania e njohur ruse e naftës “Lukoil” ka njoftuar se planifikon të shesë të gjitha asetet e saj ndërkombëtare, pas vendosjes së sanksioneve nga Shtetet e Bashkuara dhe disa vende të tjera ndaj saj dhe degëve të saj, përcjell INA.
Në njoftimin e publikuar në faqen zyrtare të korporatës, theksohet se tashmë ka nisur shqyrtimi i ofertave nga blerës potencialë për blerjen e aseteve jashtë Rusisë.
Procesi i shitjes po zhvillohet në përputhje me licencën për ndërprerjen e veprimtarisë, të lëshuar nga Zyra për Kontrollin e Aseteve të Huaja (OFAC) pranë Departamentit të Thesarit të SHBA-së.
Kujtojmë se javën e kaluar SHBA vendosi sanksione ndaj dy kompanive më të mëdha ruse të naftës, “Rosneft” dhe “Lukoil”, për shkak të luftës në Ukrainë.
Në Maqedoninë e Veriut, “Lukoil” është e pranishme me rreth 40 pika karburanti dhe qindra të punësuar, çka ngre shqetësime për ndikimin e mundshëm që mund të ketë ky vendim në tregun vendas të karburanteve dhe në punësim.(INA)
