Lojtarët e Sibenikut refuzuan të stërviten dje (e martë) pasi nuk i kishin marrë pagat që nga fillimi i vitit dhe pagesën e fundit klubi i bëri lojtarëve në dhjetor të vitit të kaluar.
“Futbollistët e Sibenikut luajtën ndeshjen e fundit të dielën kundër Hajdukut në Poljud (humbje 1-0), pas së cilës trajneri Rajko Vidoviq i dha pushim të hënën. Kur ekipi u mblodh të martën në orën 15:00, në vend të stërvitjes vendosën të bojkotojnë”, shkruajnë mediat kroate.
Informacioni për një grevë të mundshme qarkulloi me ditë të tëra dhe drejtuesit e klubit, në krye me presidentin Zheljko Karajic, u premtuan lojtarëve se borxhet do të shlyheshin deri në fund të marsit.
Trajneri Rajko Vidoviq ka caktuar një seancë të re stërvitore për sot në orën 10:00, por nëse një pagesë nuk ndodh brenda natës, skenari i djeshëm mund të përsëritet.
Mediat kroate raportojnë se revolta mund të përhapet në të gjithë akademinë dhe madje edhe në të gjithë komunitetin e punës.
Kujtojmë se Unioni i Futbollistëve Profesionist ishte i pari që paralajmëroi për situatën e keqe financiare në klub dhe problemet me të cilat përballen futbollistët.
Organizata tha se disa lojtarë rrezikoheshin të dëboheshin nga banesat e tyre për shkak të mospagimit të qirasë në kohë, por drejtuesit e klubit më pas sulmuan sindikatat për “kohën e keqe” të njoftimit. /Telegrafi/
