Shkruan: Naser Pajaziti
Një iftar me shkas sot në Prishtinë do ta shtroj kryeministri Albin Kurti me krerët e koalicionit VLEN.
Përpos shtrëngimit të duarve, hurmave dhe aminit në prag të përfundimit të muajit të Ramazanit, ky iftar e ka në tryezë edhe faktin se çka po ndodhë me Qeverinë e koalicionit me VMRO-DPMNE dhe sidomos kërshëria se çka po ndodhë me VLEN, pas debateve të fundit për zgjedhjet lokale se a do shkojnë dorë për dorë apo të ndarë për të matur secili se sa e ka kaçikun?!
VLEN nuk është më një koalicion në opozitë, por një forcë qeverisëse që duhet të dijë të menaxhojë fuqinë që ka. Nga ana tjetër, Kurti është i vetëdijshëm për peshën e tij politike, por edhe për limitet që ka në raport me shqiptarët e Maqedonisë së Veriut. Ai nuk mund t’ua imponojë një model bashkëpunimi, por as VLEN nuk mund të sillet sikur i ka të gjitha kartat në dorë.
Në politikë, peshon vetëm ajo që ke realisht dhe jo ajo që pretendon. Fuqia nuk matet me deklarata të mëdha, por me aftësinë për të prodhuar rezultate. Prandaj, ky takim nuk duhet të jetë vetëm një garë egosh, por një përpjekje për të ndërtuar një kompromis që garanton vlerën dhe peshën e secili! dhe në fund suksesin në zgjedhjet lokale.
Politika nuk është eksperiment për ego personale, por një angazhim për të çuar përpara interesat e votuesve!
